南方的溫度

尚骨力的攏佇遮 閣有尚溫順的 佇夢欲醒晉前 聽候日光射入佇早起的霧 阿霧，這馬貼佇彼个囡仔的 內惟埤 風來矣，毋過芎蕉葉的搖擺 只是輕輕仔爾爾…… 咱毋通給路邊的草花吵醒 閣有田墘的露螺 阿牛啊，乖，請你共跤步放慢 風來矣，風知影 天未光，阿公阿媽的跤脊 就隱痀佇飽仁的稻穗中央 阿稻穗，這馬已經是金色的矣 你的跤脊就是怹的跤脊 我欲佮你交換一个祕密 咱細聲仔講 阿牛啊，乖，咱鬥陣行來去 彼爿，恬靜的田園 招你的伴，猶閣有我的伴 咱欲鬥陣行入 另外一个夢 佇遐，你的叫聲永遠袂老 你看，怹攏佇遮矣 你講啥？ 會啦，彼頂瓜笠仔，我會抾起來 我小等咧就給伊抾起來 小等咧，趁人 猶未醒來晉前  

台語詩情01-胡長松-下課時間

詩 數